Paketa prej 250 milion Dollarësh përfshin municione për mbrojtjen ajrore, artileri dhe armë antitank
Shtëpia e Bardhë ka miratuar një paketë ndihme ushtarake për Ukrainën me vlerë rreth 250 milionë Dollarë.
Paketa e fundit përfshin municione për mbrojtjen ajrore, artileri dhe municione të vogla dhe armë antitank, thonë zyrtarët amerikanë, por shënon financimin e fundit pa miratimin nga Kongresi, ku bisedimet kanë ngecur. Shtëpia e Bardhë ka paralajmëruar se pa miratimin e fondeve shtesë, ndihma amerikane për Ukrainën do të mbarojë deri në fund të vitit.
Ukraina ka paralajmëruar se përpjekjet e luftës dhe financat e saj publike janë në rrezik nëse ndihma e mëtejshme perëndimore nuk vjen. Megjithëse përpjekja e luftës në Ukrainë ka mbështetje të gjerë në Kongresin e SHBA, një marrëveshje për armë të tjera është ndalur nga republikanët të cilët këmbëngulin se masat më të ashpra të sigurisë në kufirin SHBA-Meksikë duhet të jenë pjesë e çdo marrëveshje ndihme ushtarake.
Një masë shpenzimesh emergjente që do të kishte siguruar 50 miliardë Dollarë për Ukrainën dhe 14 miliardë Dollarë për Izraelin, u kundërshtua në Senat në fillim të këtij muaji, me çdo republikan që votoi kundër së bashku me Bernie Sanders që ka shprehur shqetësime për luftën e Izraelit kundër Hamasit.
Sekretari i Shtetit Antony Blinken tha në një deklaratë se ishte e domosdoshme që Kongresi të veprojë shpejt, sa më shpejt të jetë e mundur, për të çuar përpara interesat e sigurisë kombëtare duke ndihmuar Ukrainën të mbrohet dhe të sigurojë të ardhmen e saj.
Ndërsa financimi është ngadalësuar, forcat ruse kanë vazhduar të luftojnë në lindje të vendit, ku pushtuan një qytet kyç në fillim të kësaj jave.
Klan News
