Këshilltari i Sigurisë Kombëtare i Shteteve të Bashkuara, Jake Sullivan ka reaguar përmes një postimi në Twitter në lidhje me sulmin kibernetik të Iranit që u përball vendi ynë në Korrik. Këshilltari Sullivan tregon se ka zhvilluar një bisedë me kryeministrin Rama si dhe shpreh mbështetjen për Shqipërinë.
“Kam folur sot me Kryeministrin e Shqipërisë Rama. Shtetet e Bashkuara qëndrojnë me aleatin tonë të NATO-s pas sulmit kibernetik të Iranit më 15 Korrik”, ka shkruar në Twitter Këshilltari i Sigurisë Kombëtare i Shteteve të Bashkuara, Jake Sullivan.
Një ditë më parë, kryeministri Edi Rama u shpreh se pas sulmit kibernetik, që u përball vendi ynë në Korrik, ka prova të pakundërshtueshme që qëndron Irani. Qeveria shqiptare njoftoi ndërprerjen e marrëdhënieve me Iranin dhe i la afat 24 orë gjithë stafit diplomatik dhe teknik të Ambasadës së Republikës Islamike të Iranit për të lënë Shqipërinë.
Ndërkohë, ditën e sotme pas përfundimit të afatit të përcaktuar nga qeveria shqiptare përfaqësues të diplomacisë iraniane kanë lënë ambientet e ambasadës për t’u larguar nga Shqipëria. Vetëm pak minuta më vonë godina është marrë në kontroll nga policia shqiptare./tvklan.al
