Rumania i dërgon Ukrainës një kundërajror Patriot. Anëtarja e NATO-s, Rumania, njoftoi të enjten se do t’ia dërgojë Ukrainës një kundërajror Patriot, pas kërkesës së Kievit për ndihmë në luftën e tij kundër forcave pushtuese të Rusisë.
“Duke e marrë parasysh përkeqësimin e gjendjes së sigurisë në Ukrainë, anëtarët e këshillit vendosën t’ia dhurojnë Ukrainës një sistem Patriot, në bashkëpunim të ngushtë me aleatët. Donacioni u bë me kusht që vendi ynë vazhdon bisedimet me aleatët, në veçanti me SHBA-në, për pranimin e një sistemi të ngjashëm apo barasvlershëm për ta mbrojtur hapësirën tonë ajrore”, tha Këshilli Suprem për Mbrojtje Kombëtare i Rumanisë.
Së voni, Gjermania njoftoi se do t’ia dërgojë Ukrainës kundërajrorin e tretë Patriot, ndërsa Shtetet e Bashkuara pritet t’ia dhurojnë një bateri të dytë Kievit, sipas mediave amerikane. Rumania e nënshkroi një marrëveshje në vlerë 4 miliardë dollarë për shtatë bateri Patriote me SHBA-në më 2017, që është marrëveshja më e madhe për mbrojtjen në historinë e saj. Dy prej katër kundërajrorëve që i ka marrë deri tani, janë plotësisht funksionalë.
Rumania i ka dhënë ndihmë ushtarake Ukrainës në luftën e saj kundër Rusisë, por nuk ka pranuar të tregojë shkallën e mbështetjes, për shkaqe sigurie. Ajo është zotuar edhe t’i stërvitë pilotët ukrainas për përdorimin e avionëve luftarakë F-16, në një qendër rajonale të përuruar në nëntor 2023. Kjo është një ndihmë e rëndësishme për Ukrainën në kohën e krizës së sigurisë, dhe tregon solidaritetin e vendeve aleate me vendin e sulmuar.
