Misioni i shuarjes së flakëve në Greqi, ku marrin pjesë edhe forcat zjarrfikëse shqiptare vijon pa ndërprerje. Sipas një postimi nga ministri i Mbrojtjes, Niko Peleshi, prej afro 12 orësh ekipi po punon në një terren të vështirë dhe sipërfaqet e mëdha të djegura në zonën e Aleksandropolit.
“Efektivët tanë, me mision në zonat e prekura nga zjarret në Greqi janë maksimalisht të angazhuar, në operacionin e shuarjes së flakëve.
Ata po punojnë pa asnjë ndërprerje në terrenin e vështirë dhe sipërfaqet e mëdha të djegura prej afro 12 orësh. Misioni i tyre përqëndrohet më shumë në zonën e Aleksandropolit, si një nga zonat më të prekura nga kjo emergjencë.
Me vendosmëri dhe profesionalizëm të lartë, efektivët tanë po tregojnë një shembull të jashtëzakonshëm të përkushtimit në ndihmë të fqinjit tonë jugor në këto kohë të vështira”, shkruan Peleshi.
Kjo është dita e gjashtë që Greqia vijon luftën me zjarret./tvklan.al
