Paris Saint-Germaini ia ofroi Barcelonës brazilianin Neymar si pjesë e marrëveshjes për transferimin e Ousmane Dembeles në Paris.
Futbollisti francez pritet të shitet nga Barça dhe ai e ka shprehur dëshirën për të përfunduar në “Parkun e Princave”, gjë e cila pritet të ndodhë në ditët në vazhdim.
Kampioni francez pritet t’i paguajë 50 milionë euro për kartonin e ish-futbollistit të Borussia Dortmundit pasi e aktivizoi klauzolën “private” të lojtarit më 31 korrik, në ditën e fundit të afatit të saj.
Sidoqoftë, mediumi spanjoll “Sport” raporton se Barçës iu ofrua ish-futbollisti i saj, Neymar, në formë huazimi nga PSG-ja, si pjesë e negociatave që e kishin në qendër të ardhmen e Dembeles, përcjell “Gazeta Express”.
PSG-ja e kishte blerë Neymarin për 222 milionë euro pikërisht nga Barcelona në verën e vitit 2017, ndërsa me atë rast katalunasit e kishin transferuar Dembelen në vend të brazilianit për 105 milionë euro nga Dortmundi.
Neymar u rikthye sot në fushën e blertë duke shfaqur lojë fantastike në fitoren e PSG-së me rezultat 3:0 në një ndeshje miqësore parasezonale.
Braziliani i realizoi dy gola dhe e dhuroi një asistim.
