Teksa numri i emigrantëve që përpiqen të hyjnë në Europë rritet, të njëjtën gjë bën edhe numri i të vdekurve në detin Mesdhe.
Ndërsa Bashkimi Europian lufton që të kontrollojë eksodin, situata e njerëzve që i arratisen varfërisë dhe persekutimin po lë shenjën e saj në brigjet e Tunizisë, shkruan “BBC”.
Sapo dielli nis të duket mbi horizontin e bregut lindor, peshkatari Oussama Dabbebi fillon të nxjerrë rrjetën e tij të peshkimit. Fytyra e tij ngulitet mbi të për të parë ç’ka kapur sepse peshqit nuk janë gjithçka gjendet në të.
“Në vend të peshkut, ndonjëherë kap trupa të vdekur. Herën e parë u frikësova, pastaj hap pas hapi u mësova. Pas njëfarë kohe, nxjerrja e trupave të vdekur nga rrjeta ishte njësoj si të nxirrja peshqit”.
Peshkatari 30-vjeçar, i veshur me një bluzë të errët dhe tuta të shkurtra, thotë se së fundmi në rrjetat e tij gjeti trupat e 15 emigrantëve në një hark kohor prej 3 ditësh.
“Njëherë gjeta trupin e një foshnjeje. Çfarë faji ka një foshnje? Po qaja. Për të rriturit është ndryshe sepse ata kanë jetuar. Por një fëmijë, nuk ka parë asgjë”.
Dabbebi ka peshkuar në brigjet tuniziane pranë qytetit Sfax qëkur ishte 10 vjeç. Pak më tutje, një grup emigrantësh nga Sudani Jugor i cili është prekur nga konflikti, ndryshimet klimatike dhe pasiguria ushqimore që prej shpalljes së pavarësisë në vitin 2011, po ecin ngadalë drejt portit.
Të gjithë shpresojnë të mbërrijnë në Mbretërinë e Bashkuar. Një prej tyre shpjegon se janë tërhequr pa dëshirë nga një tentativë e dytë për të shkuar në Itali për shkak të një varke të tejmbushur dhe motit të keq.
Sipas Rojes Bregdetare të Tunizisë, 13.000 emigrantë janë detyruar të zbresin nga varkat e stërmbushura pranë Sfax dhe janë kthyer në breg përgjatë 3 muajve të parë të vitit.
Nga Janari deri në Prill, 24.000 persona janë larguar nga Tunizia në mjete lundruese të sajuara dhe kanë arritur në Itali. Aktualisht vendi është një prej pikënisjeve kryesore për emigrantët që përpiqen të hyjnë në Europë./tvklan.al
