Putin urdhëron luftëtarët e Wagner të nënshkruajnë betimin për besnikëri ndaj shtetit rus.
Përmes një dekreti të posaçëm dhe me efekt të menjëhershëm, kreu i Kremlinit synon të marrë kontrollin total të grupit të mercenarëve pas vdekjes së Jevgeni Prigozhin.
Dekreti, i publikuar në faqen e internetit të Kremlinit, është detyrues për këdo që kryen punë në emër të ushtrisë ose që mbështet atë që Moska e quan “operacioni i saj special ushtarak” në Ukrainë.
Luftëtarët duhet të zotohen për “besnikëri ndaj Federatës Ruse, të ndjekin rreptësisht urdhrat e komandantëve dhe eprorëve të tyre dhe të përmbushin me ndërgjegjie detyrimet e tyre“, thuhet në dekret.
Analistët sugjerojnë se dekreti i Putinit është pjesë e përpjekjeve për të rikthyer autoritetin e tij pas rebelimit të Wagner në Qershor.
Kjo lëvizje e Putinit vjen pak ditë pas rrëzimit të avionit te Prigozhin dhe shtimit të akuzave nga Perëndimi se ai është urdhëruesi dhe ekzekutuesi i kreut të Wagner.
Një vlerësim paraprak i inteligjencës amerikane arriti në përfundimin se një shpërthim i qëllimshëm shkaktoi rrëzimin e avionit.
Klan News
