“Nuk kemi pse përfshihemi në konflikt me Kinën për Tajvanin”
Një deklaratë e presidentit francez Emanuel Makron, bërë gjatë kthimit nga vizita në Kinë, se Europa duhet të ulë varësinë ndaj Shteteve të Bashkuara dhe të shmangë përfshirjen në konflikte me Kinën, për çështjen e Tajvanit, ka shkaktuar një vorbull reagimesh të shumta.
Spikat ndër të tjera një shkrim editorial i prestigjozes Uoll Strit Xhërnëll, që në titul shkruan se “Makron ka qëndrime të gabuara për Tajvanin dhe Ukrainën”. Kjo e përditshme thotë se Makroni po dëmton përpjekjet e Uashingtonit për të penguar Kinën të sulmojë Tajvanin dhe se po minon mbështetjen e Shteteve të Bashkuara për Europën.
Senatori republikan amerikan Marko Rubio tha se sipas logjikës së Makronit, Shtetet e Bashkuara duhet të fokusohen vetëm tek Tajvani dhe Europa duhet ta zgjidhë vetë krizën e Ukrainës. Disa Eurodeputetë thanë se fjalët e Makronit nuk duhet të konsiderohen si qëndrim i Bashkimit Europian.
Megjithatë, zëdhënësi për sigurinë kombëtare në Shtëpinë e Bardhë, garantoi se marrëdhëniet dhe bashkëpunimi mes Uashingtonit dhe Parisit mbeten të fuqishme edhe pas këtyre komenteve.
Tv Klan
