Ministri i Drejtësisë, Krenar Lloga ka nënshkruar sot Udhëzimin me të cilin në certifikatat e lidnjes, kurorëzimit dhe vdekjes, do të shkruhet edhe përkatësia etnike e bartësit, përcjell Klan Maqedoni.
“Nënshkruajta Udhëzimin për ndryshim dhe plotësim të Udhëzimit për mënyrën e mirëmbajtjes, mbrojtjes dhe ruajtjes së librave amë dhe dokumentacioneve; lëshimin e certifikatave, vërtetimeve dhe kopjeve duke u bazuar në librat amë; drejtimin e procedurës dhe hartimin e procesverbalit për fëmijë të gjetur; riparimin e librave amë të shkatërruar, dëmtuar apo të zhdukur, si dhe formateve për librat amë, regjistrit të librave amë, certifikatave dhe vërtetimeve të cilat lëshohen duke u bazuar në librat amë, ku do të ketë një shtyllë për përkatësinë etnike.
Ky Udhëzim do të hyjë në fuqi pas skadimit një ditë nga botimi në Gazetën Zyrtare për certifikatat e lindjes, ndërsa për certifikatat tjera për shkak të implikimeve financiare, Udhëzimi do të fillojë të zbatohet nga 1 janari 2024”, thuhet në njoftimin e Llogës./KlanMacedonia
