KRYESON SHKËNDIJA PARA SHKUPIT DHE STRUGA TL
Dy fitore të skuadrave vendase, dy barazime dhe dy fitore të skuadrave mysafire, me gjithësejt 10 gola të shënuar, është epilogu i ndeshjeve të javës së 11-të në Ligën e Parë të Futbollit.
Në Tetovë, ndeshja interesante përplot me raste, Shkëndija – AP Brera, përfundoi me rezultatin 1:1 Të parët në epërsi kaluan mysafirët me supergolin e Antonio në minutën e 76-të, ndërsa barazoi Adenis Shala në minutën e 79-të.
Sipas trajnerit të “kuqezinjve”, barazimi është epilogu real i kësaj ndeshjeje.
“Mendoj se ishte një superndeshje nga të dyja skuadrat, niveli i tillë apo futbolli i tillë rrit nivelin e kampionatit, një ndeshje e taktizuar nga të dyja skuadrat, me shumë ritëm dhe realisht me shumë raste të krijuara, si njëra si tjetra. Rezultati 1 me 1 ndoshta ishte më i realti, për shkak se edhe ne krijuam shumë edhe kundërshtari krijoi rastet e veta, mendoj që të jenë ndeshjet në këtë nivel, në këtë formë, mendoj se do të rritemi të gjithë.”, tha Ardian Nuhiu.
Kampioni në fuqi, Struga Trim&Lum, në transfertë mundi Makedonia GJP me rezultatin 3:0, me golat që i shënuan Mazrekaj, Gurra dhe Besart Ibraimi.
Në stadiumin e Bashkimit në Kumanovë, Shkupi me golin e Ilievskit, mundi Bregallnicën 1:0.
Ndeshja e dy skuadrave shqiptar, Gostivari dhe Voska Sport, përfundoi me rezultatin e barabartë 1:1.
Në stadiumin Boris Trajkovski në Maxhari, Vardari befasoi ekipin vendas, Rabotniçkin, duke e mundur me rezultat 1:0.
Ndërsa në Kratovë, Sileksi mundi ekipin e Tikveshit 1:0.
Pas javës së 11-të, tabelën e kryesojnë. Shkëndija me 24 pikë, para Shkupit që ka 22 pikë dhe Struga Trim&Lum me 21 pikë.
/Shaban Sinani – Klan Macedonia/
