Sipas NASA-s, ylli më i largët i zbuluar ndonjëherë është më shumë se dy herë më i nxehtë se dielli dhe rreth një milion herë me më shumë shkëlqim.
Teleskopi Hapësinor James Webb ka zbuluar detaje të reja rreth yllit, të quajtur Earendel, i cili u zbulua vitin e kaluar.
Earendel, pjesë e galaktikës “Sunrise Arc”, bëhet i dallueshëm vetëm sepse grupi i galaktikave është aq masiv sa që shtrembëron strukturën e hapësirës, duke prodhuar një efekt zmadhues që astronomët mund ta shikojnë, sipas NASA-s. Në muajt që pas zbulimit të Earendel-it, Webb ka parë yje të tjerë shumë të largët, edhe pse asnjëri jo aq larg sa Earendel.
Ekipi hulumtues ka shpresë se zbulimi i këtij ylli mund të jetë hapi i parë drejt zbulimit përfundimtar të një prej gjeneratës së parë të yjeve, të përbërë vetëm nga hidrogjeni dhe heliumi. Për shkak të distancës së Earendelit nga Toka, u deshën 12.9 miliardë vjet që drita e tij të arrinte tek ne, thonë shkencëtarët.
Universi ishte më pak se një miliard vjet i vjetër kur u emetua drita. Ylli tani është 28 miliardë vite dritë larg. Bazuar në ngjyrat e vëzhguara me Webb, astronomët besojnë se Earendel, që do të thotë “yll i mëngjesit”, mund të ketë gjithashtu një yll shoqërues më të ftohtë dhe më të kuq.
Ylli i mëparshëm i vetëm më i vjetër dhe më i largët u vëzhgua nga Hubble në 2018. Ai quhej Icarus dhe dritës së tij iu deshën 9 miliardë vjet për të arritur në Tokë, sipas NASA-s.
Victoria Strait, bashkëautore e studimit fillestar mbi Earendel, tha më parë se ylli i vjetër u ofron shkencëtarëve një mundësi për të mësuar më shumë për të kaluarën./tvklan.al
