Fati i të zhdukurve me forcë ka qenë prej kohësh një plagë e thellë në shoqërinë tonë. Kështu thotë në deklaratën e saj, Presidentja e Kosovës, Vjosa Osmani, e cila ka mirëpritur miratimin e Deklaratës së përbashkët politike për Personat e Zhdukur nga ana e kryeministrit Kurti dhe presidentit serb Vuçiq, përcjell KlanM.
“Familjet që vazhdojnë të kërkojnë vendndodhjen e të dashurve të tyre, të cilët u zhdukën me forcë nga regjimi i Millosheviqit dhe përmes një sistemi të krimeve të luftës dhe gjenocidit të sponsorizuar nga shteti, kanë mbi dy dekada që mbajnë këtë barrë të rëndë në zemrat dhe në emër të një vendi të tërë.. Atyre u është mohuar në mënyrë çnjerëzore drejtësia dhe paqja për një kohë të gjatë”, thotë Osmani.
Megjithatë, presidentja Osmani rikujton se Serbia ka një histori në mospërmbushje të marrëveshjeve të arritura deri tani.
“Shpresojmë që Deklarata e rënë dakord sot në Bruksel do të hapë rrugën për njohjen e këtyre krimeve dhe për drejtësinë. Por mbi të gjitha, një moment lehtësimi për familjet që kanë pësuar dhimbje dhe vuajtje të pashpjegueshme… Kjo deklaratë do të kërkojë zbatim të menjëhershëm dhe për këtë, siç e dimë nga marrëveshjet e mëparshme, Serbia ka një histori të paimagjinueshme”. /KlanMacedonia
