Prej disa javësh, kopshtari australian Humphrey Herington përpiqej të zbulonte hajdutin e pacipë që hante filizat e tij.
Në fillim ai mendoi se do ishin disa dhi të humbura. Ndoshta ndonjë oposum i bezdisshëm. Gjëja e fundit që priste ishte kur një ditë, teksa hyri në ambientin e punës gjeti një koala “lozonjare”, të hutuar dhe të ngopur sa nuk mund të lëvizte dot, të rrethuar nga pemët e zhveshura të eukaliptit.
“Dukej sikur ishte ngopur. Dhe dukej shumë i kënaqur me veten”, u shpreh ai për “BBC”.
Stafi po ndërton gardhe rreth filizave për t’i ruajtur nga koala e quajtur Claude, që deri më tani i ka shkaktuar kopshtit një dëm prej 3800 Dollarësh.
Për ironi të fatit, pemët që Claude ka asgjësuar do të përdoreshin për të rritur habitatet e koalave në rajon duke qenë se është një kafshë e rrezikuar nga zhdukja.
Pasi zbuloi ‘hajdutin’ misterioz, Herington e mbështolli me peshqir dhe e la rreth 300 metra larg kopshtit. “Por dy ditë më vonë u rikthye dhe vazhdoi vizitat e tij”.
Megjithatë, ai nuk është mërzitur nga situata, përkundrazi. “S’mund ta besoja që ishte një koala. Isha i tronditur por edhe i habitur”. Së bashku me këto ndjesi, vjen edhe shqetësimi.
“Kam rreth 20 e ca vite këtu dhe kjo nuk ka ndodhur më parë. Vërtet nuk ka ushqim?”, pyet ai.
Në vitin 2022, koalat u listuan ndër speciet më të rrezikuara në Australi pas rënies drastike në popullatën e tyre. Marsupiali kërcënohet nga shpyllëzimi, zjarret, thatësira, sëmundjet dhe rreziqe të tjera.
Në vitin 2021, u tha se koalat mund të zhdukeshin plotësisht deri në vitin 2050 nëse nuk merren masa të menjëhershme. Sipas organizatave, mund të ketë rreth 50.000 individë që jetojnë në habitatet natyrore./tvklan.al
