Von Crammon për aplikimin e Kosovës në BE: Nuk është koha e duhur

Raportuesja për Kosovën nga Parlamenti Evropian, Viola Von Crammon, ka ripërsëritur se “nuk është koha e duhur” për aplikim të anëtarësimit të Kosovës në Bashkimin Evropian. Kjo, pasi që, një gjë e tillë do të bllokohej nga pesë shtetet mos-njohëse të sovranitetit të Kosovës, që janë pjesë e BE-së.

PROGRAM I PAGUAR POLITIKË 300x250

Ajo këto deklarata i ka bërë pas miratimit të rezolutës së saj për Kosovën në Parlamentin Evropian, në një konferencë për media.

“Po ashtu, përkrahim aplikimin e Kosovës në Këshillin e Evropës, por kemi bërë dallim të qartë kur kemi thënë për aplikim në BE, shkaku i shteteve të mos-njohëse. Këtë e kam thënë edhe në Kosovë”, ka deklaruar ndër të tjera raportuesja e PE-së.

Von Cramon ka thënë se pa arritjen e një marrëveshje mes Kosovës dhe Serbisë, nuk do të mundësohet anëtarësimi në BE.

“Në raport theksohet nevoja e normalizimit të marrëdhënieve për Serbinë, që bazohet me njohjen reciproke. Dialogu mes Beogradit dhe Prishtinës nuk ka qenë fort progresiv dhe marrëveshjet e arritura në të kaluarën po vendosen në dyshim. Po ashtu, përsërisim ftesën që gratë të përfshihen në ekipin negociator në dialog”, ka thënë në konferencë ajo.

Liderët e institucioneve kosovare, përkundër thirrjeve nga BE-ja, kanë bërë të ditur se do të aplikojnë për anëtarësim në unionin evropian përgjatë këtij viti.

Përfaqësuesja e PE-së ka folur edhe për çështjen e liberalizimit të vizave, duke thënë se po bëjnë çmos ta zhbllokojnë situatën. Von Cramon ka përmendur një momentum që mund t’ia ndryshojë qëndrimin Parisit zyrtar për lëvizje lirshëm të kosovarëve.

Lexo gjithashtu
Total
0
Share