Një foto që po qarkullon së fundmi në rrjete sociale tregon një turmë të madhe prej më shumë se 200 personash, të ulur në mes të rrënojave të Jabalya në Gazën veriore.
Kryesisht burra, shumë janë pothuajse të zhveshur, disa janë të moshuar, e disa të plagosur dukshëm.
Fotoja u shpërnda fillimisht në një kanal izraelit në Telegram; ndërsa është e paqartë se kush e mori atë, disa nga burrat në foto thanë për CNN se ushtarët izraelitë po i fotografonin.
Njëri prej tyre, Muhannad Khalaf, tha se ai, gruaja e tij dhe djali i tyre i mitur po përpiqeshin të iknin nga kampi duke përdorur një korridor të sigurt të caktuar kur ushtria izraelite i ndaloi, përcjell Telegrafi.
“Të gjithë ishim mbledhur në një vend – burra, gra, fëmijë dhe të moshuar. Kjo ishte në orën 11 të mëngjesit. Pas pesë orësh, në orën 4 pasdite, ata u kërkuan grave dhe fëmijëve të ecnin përpara dhe të mbanin të gjitha çantat dhe gjërat tona”, tha ai duke shtuar se gratë dhe fëmijët u lejuan të largoheshin.
“Pasi u larguan, burrat u udhëzuan të hiqnin rrobat dhe të qëndronin vetëm me të brendshme. Ne u pajtuam. Qëndruam në të ftohtë për disa orë të tjera. Ata na fyenin gjatë asaj kohe, na thërrisnin me emra, qeshnin dhe bënin foto”, shtoi ai.
Khalaf vazhdoi: “Disa individë u përzgjodhën për paraburgim, ndërsa të tjerët u liruan. Shumica prej nesh përfunduam në qytetin e Gazës”.
Ndryshe, IDF rrethoi Jabalya dhe nisi një operacion të ri tokësor atje më shumë se tre javë më parë, duke ndërprerë shumicën e furnizimeve dhe duke i detyruar njerëzit të largoheshin mes luftimeve të ashpra.
IDF tha se pa shenja të rindërtimit të Hamasit në zonë, pavarësisht një viti të bombardimeve të rënda dhe dy operacioneve të mëparshme tokësore për të cilat ushtria kishte pretenduar se ishin të suksesshme.
Në javët e fundit, ushtria izraelite ka lëshuar urdhra të përsëritur evakuimi për Gazën Veriore, duke përfshirë hedhjen e fletushkave mbi Jabalya për të paralajmëruar banorët që “të evakuohen menjëherë”.
Ndërsa ushtria izraelite refuzoi të komentonte situatën e kapur në fotografi, ajo pranoi se ka mbajtur në mënyrë rutinore dhe ka kontrolluar njerëz si pjesë e operacioneve të saj luftarake në Gaza.
“Individët e dyshuar për përfshirje në aktivitete terroriste po arrestohen dhe merren në pyetje”, tha IDF në një deklaratë.
Ajo shpjegoi se të arrestuarit trajtohen në përputhje me të drejtën ndërkombëtare, por gjithashtu tha se “shpesh është e nevojshme që të dyshuarit për terrorizëm të dorëzojnë rrobat e tyre në mënyrë që ato të kontrollohen dhe të sigurohen që ata të mos fshehin jelekë shpërthyes ose tjetër armatim”.
“Për shkak të protokollit të sigurisë, rrobat nuk u kthehen menjëherë të arrestuarve”, vazhdoi deklarata e IDF, duke shtuar se rrobat kthehen sapo të jetë e mundur “.
Konventat e Gjenevës, një grup ligjesh ndërkombëtare që përcaktojnë rregullat e konfliktit të armatosur, thonë se çdo i burgosur duhet të trajtohet në mënyrë njerëzore.
Rregullat në mënyrë eksplicite ndalojnë aktet që “shkelin dinjitetin personal, veçanërisht trajtimin poshtërues”.
Kryqi i Kuq Ndërkombëtar thotë se kontrollet ndërhyrëse, duke përfshirë kontrollet e të burgosurve “duhet të ndërmerren vetëm nëse është absolutisht e nevojshme” dhe jo përpara të burgosurve të tjerë.
Kombet e Bashkuara dhe organizata të tjera të të drejtave të njeriut kanë kritikuar ushtrinë izraelite për arrestimin dhe zhveshjen e njerëzve gjatë fushatës së saj ushtarake në Gaza.
Ndërkohë, Komisioni i Pavarur Ndërkombëtar i OKB-së për Hetimin e Territorit të Pushtuar Palestinez dhe Izraelit tha muajin e kaluar se zbuloi se “lakuriqësia e detyruar, me qëllim të degradimit dhe poshtërimit të viktimave para ushtarëve dhe të burgosurve të tjerë, përdorej shpesh kundër viktimave meshkuj”.
Human Rights Watch dhe Amnesty International dënuan gjithashtu Izraelin për atë që ata thanë se ishte një praktikë e përhapur.
