Ministri i Punëve të Brendshme, Pançe Toshkovski, ka njoftuar se në bashkëpunim me Prokurorinë Publike janë ngritur padi penale ndaj 34 personave fizikë për tragjedinë në Koçan dhe 3 personave juridikë.
PANÇE TOSHKOVSKI – MINISTËR I MPB-SË
“Ndaj 34 personave fizikë dhe tre personave juridikë janë ngritur dy kallëzime penale për veprën penale të “veprave të rënda kundër sigurisë së përgjithshme” nga neni 292 në lidhje me shkaktimin e rrezikut të përgjithshëm nga neni 288 i Kodit Penal.”
Toshkovski tha se do të ishte e padrejtë që për këtë rast të akuzohen të pafajshmit, por padrejtësi sipas tij do të ishte edhe nëse shteti nuk merr asnjë masë ndaj atyre që ka dyshime të bazuara.
Tha se ndjen përgjegjësi morale, por edhe njëherë e përsëriti se nuk do të japë dorëheqje.
PANÇE TOSHKOVSKI
“Thellë brenda meje ndjej përgjegjësi morale, por besoj se në këto momente është më e rëndësishme të tregosh përgjegjësi duke vepruar. Prandaj, mbetem këtu me të njëjtën vendosmëri dhe përkushtim, për ta luftuar këtë betejë deri në fund. Dhe në të ardhmen, kur të vijë dita që karriera ime politike të përfundojë, le të përfundojë ashtu siç ka nisur, me dashuri dhe besnikëri ndaj vendit.”
Toshkovski tha se ndaj një personi është ngritur kallëzim penal edhe për marrje ryshfeti nga neni 357 i Kodit Penal.
