Bilanci i viktimave arrin në 14, kryeministri Mitsotakis viziton zonat e përmbytura dhe premton ndihmë
Raftet e një dyqani pijesh të shndërruara në shtretër për gratë e moshuara të prekura nga përmbytjet në qytetin grek të Palamas.
Dimosthenis Tsiapas, i cili zotëron dyqanin e pijeve, thotë se i përshtati raftet shtretërit për nënën dhe hallën.
“Kam një biznes të shkatërruar nga stuhia Daniel dhe jam vetëm me dy gra të sëmura, nënën dhe motrën e babait, të cilat i nxora nga banesa e përmbytur me një varkë nuk kisha ku t’i vendosja. I hoqa shishet e pijeve nga raftet dhe vendosa këto dy gra 85-vjeçare”.
Pamjet satelitore tregojnë katastrofën e përmbytjeve masive në disa qytete të Greqisë me një bilanc tragjik prej të paktën 14 viktimash.
Fotografitë e zonave të përmbytura të ofruara nga Maxar Technologies shfaqin kontrastin e fortë me fotografitë e bëra në Shtator të vitit të kaluar mbi qytetet dhe fshatra si Palamas, Koskinas, Agia Triada dhe Metamorfosi.
Stuhia Daniel, për të cilën meteorologët thanë se ishte më e keqja që goditi vendin që nga fillimi i regjistrimit të fenomeneve meteorologjike në vitin 1930, goditi Greqinë për tre ditë nga e marta, duke lënë një gjurmë rrënimi pas një vape rekord që gjithashtu solli zjarre të mëdha.
Shtëpitë u rrënuan nga përrenjtë, urat u shembën, rrugët u shkatërruan, linjat e energjisë ranë dhe të korrat në fushën pjellore të Thesalisë u zhdukën.
Shkencëtarët thonë se Greqia është në vijën e parë të ndryshimeve klimatike, me fenomene ekstreme moti gjithnjë e më të zakonshme.
Klan News
