Një studim i fundit ka konfirmuar se vrapimi është një nga ushtrimet më efikase për të përmirësuar shëndetin dhe për të zgjatur jetën. Sipas hulumtimeve të publikuara në “Progress in Cardiovascular Diseases”, çdo orë e kaluar në vrapim mund të shtojë deri në shtatë orë në jetëgjatësinë e një personi. Vrapuesit që përshkojnë 20-30 kilometra në javë tregojnë një imunitet më të fortë dhe janë më pak të ndjeshëm ndaj sëmundjeve si e ftohura.
Më tej, ekspertët theksojnë se vrapimi jo vetëm që ndihmon në ruajtjen e një mendjeje të qartë, por gjithashtu lufton depresionin dhe ankthin, falë lirimit të endorfinave – hormonet e lumturisë. Përfitimet e vrapimit nuk përfundojnë këtu, ai është i dobishëm për zemrën, sistemin imunitar, mushkëritë, trurin dhe qarkullimin e gjakut. Studimet tregojnë se ata që vrapojnë rregullisht kanë një rrezik 25-40% më të ulët të vdekjes së parakohshme dhe mund të jetojnë deri në tre vjet më gjatë se ata që nuk vrapojnë.
Vrapimi gjithashtu kontribuon në ndërtimin e karakterit, duke shtuar disiplinën dhe kreativitetin në punë dhe jetën personale. Një studim nga Universiteti i Miçiganit zbuloi se vrapimi i rregullt mund të forcojë kockat, duke rritur dendësinë e tyre minerale. Në lidhje me gjininë dhe vrapimin, burrat kanë tendencë të vrapojnë më shpejt, ndërsa gratë tregojnë qëndrueshmëri më të madhe, veçanërisht në pjesën e dytë të maratonave, ku ato përshpejtojnë ritmin dhe arrijnë performanca më të larta.
