Një shpërthim i madh gazi në kryeqytetin kenian, Nairobi, ka vrarë të paktën tre persona dhe ka plagosur rreth 300 të tjerë.
Një kamion që transportonte cilindra gazi shpërtheu në rrethin Embakasi rreth orës 23:30 të enjten, “duke ndezur një top të madh zjarri”, tha një zyrtar, raporton BBC, transmeton Klan Kosova.
Banesa, biznese dhe makina u dëmtuan, me video që tregon një flakë të madhe që shpërtheu pranë blloqeve të banimit.
Zona është rrethuar dhe po hetohet për shkaqet e shpërthimit.
Një fëmijë ishte në mesin e atyre që vdiqën, sipas shefit të policisë Embakasi, Wesley Kimeto, i cili shtoi se numri i të vdekurve mund të rritet.
Rreth 271 persona u dërguan në spital, sipas autoriteteve, duke përfshirë të paktën 25 fëmijë.
Guvernatori i qarkut Nairobi Sakaja Johnson tha se shumë nga këta njerëz ishin trajtuar dhe dërguar në shtëpi, por të paktën 39 janë dërguar në objekte të tjera – disa me lëndime kritike.
27 persona të tjerë u trajtuan në vendngjarje për lëndime që nuk janë kërcënuese për jetën.
Qeveria fillimisht tha se shpërthimi ndodhi në një fabrikë gazi ku punëtorët po rimbushnin bombolat e gazit, por autoritetet më vonë sqaruan se një kamion kishte shpërthyer në një oborr parkimi.
Sipas zëdhënësit të qeverisë, Isaac Mwaura, një top zjarri nga shpërthimi “u përhap gjerësisht”. Një bombol gazi fluturues ka goditur një magazinë veshjesh dhe tekstilesh, duke e djegur atë.
“Zjarri dëmtoi më tej disa automjete dhe prona komerciale, duke përfshirë shumë biznese të vogla dhe të mesme,” tha ai në një deklaratë.
“Mjerisht, shtëpitë e banimit në lagje morën flakë gjithashtu, me një numër të madh banorësh ende brenda, pasi ishte natë vonë”.
Zjarri është vënë nën kontroll dhe një operacion kërkim-shpëtimi është nisur për të zbuluar nëse njerëzit janë të zhdukur ose thjesht janë strehuar diku tjetër.
