Një thirrje anonime për bombë të vendosur në autobus të Ndërmarrjes Publike të Transportit ka paralizuar Shkupin. Punëtorët nuk arritën të shkojnë me kohë nëpër punë, kurse fëmijët u vonuan për në shkollë, pasi autobusët e Transportit publik ishin tërhequr nga trafiku, kurse në transportin publik privat u krijua rrëmujë dhe kaos.
Policia ka ndaluar një punonjës të Ndërmarrjes së Transportit Publik , për të cilin vlerësojnë se ka dërguar kërcënimet përmes postës elektronike. Ekipi policore të anti-terrorit kanë kryer kontrolle, pas cka autobusët nisën të kthehen në trafik.
“J.I nga e-maili I tij, në e-mailin zyrtar të ndërmarrjes dhe në e-mailat e të gjithë drejtorëve, shërbimeve financiare, juridike dhe të tjerëve, duke u kërcënuar se për shkak të mospagesës së rrogës, ka planifikuar të vendos bombë në autobus të NPT, që do të shpërthente gjatë protestave të sotme” – njoftoi MPB-ja.
Zhvillimi i këtillë i ngjarjeve erdhi pasi dje kishte paralajmërime për protesta nga ana e Sindikatave të NPQ-së, për shkak të mospagesës së pagave dhe situatës së rëndë financiare në të cilën gjendet ndërmarrja. Kryebashkiakja e Shkupit, Danela Arsovska, për kolapsin në transportin publik ka akuzuar Qeverinë dhe vetëqeverisjen lokale, se nuk ka shlyer detyrimet ndaj NPQ-së.
Qeveria përgënjeshtroi se ka borxhe, pasi Sekretari i Përgjithshëm i Qytetit të Shkupit, Zoran Gligorov, tha se MASH-i ka borxh prej 120 milion denarëve ose rreth 2 milion euro për transportin pa pagesë për nxënësit dhe studentët.
Me kërkesë të grupit të këshilltarëve të VMRO-DPMNE-së për sot është thirrur një seancë e jashtëzakonshme e Këshillit të Qytetit të Shkupit. Propozohet që nga buxheti mjetet të ridestinohen për pagat e punonjësve të Ndërmarrjes Publike “Shkupi”. /KlanMacedonia/
