Shtetet e Bashkuara po ndalojnë disa programe të ndihmës së huaj për qeverinë e Nigerit, por do të vazhdojnë të japin ndihmë humanitare dhe ushqimore, tha të premten Sekretari amerikan i Shtetit, Antony Blinken.
Junta ushtarake përmbysi presidentin e zgjedhur në mënyrë demokratike të Nigerit, Mohamed Bazoum dhe qeverinë e tij më 26 korrik.
“Siç e kemi bërë të qartë që në fillim, ndihma amerikane për qeverinë e Nigerit varet nga qeverisja demokratike dhe respektimi i rendit kushtetues,” tha Blinken në një deklaratë të premten.
Shefat e mbrojtjes të vendeve të Afrikës Perëndimore kanë hartuar një plan për ndërhyrje ushtarake nëse grushti i shtetit të Nigerit nuk përmbyset deri të dielën.
“Ne mbetemi të përkushtuar për të mbështetur popullin e Nigerit për ta ndihmuar të ruajë demokracinë dhe përsërisim thirrjen për rikthimin e menjëhershëm në pushtet të qeverisë së zgjedhur në mënyrë demokratike të Nigerit,” tha Blinken.
Vendi afrikan është një partner kyç për luftën e Uashingtonit kundër kryengritësve islamikë, të cilët kanë vrarë mijëra njerëz dhe kanë zhvendosur miliona të tjerë. Personeli ushtarak amerikan ka stërvitur forcat lokale për të luftuar grupet militante.
Administrata e Presidentit Joe Biden e kishte konsideruar gjithashtu Nigerin si një histori suksesi demokratik në një rajon që është përballur me një serë grushtesh shteti ose tentativa për marrjen e pushtetit gjatë tre viteve të fundit.
Ambasada e SHBA në Niamey tha në vitin 2021 se Pentagoni dhe Departamenti i Shtetit i kishin ofruar Nigerit më shumë se 500 milionë dollarë pajisje dhe trajnime që nga viti 2012./VOA
