Derisa Samitit Evropian të këtij muaji po i afrohet fundit, kancelari gjerman, Olaf Scholz pranoi se ishte ai që e bindi homologun e tij hungarez, Viktor Orban të largohej përkohësisht nga dhoma e Këshillit gjatë diskutimeve për Ukrainën – por Scholz vuri në dukje se kjo nuk mund të jetë një “zgjidhje universale”.
Kjo i lejoi 26 liderët e tjerë të merrnin vendimin historik njëzëri. Rregullat e BE-së thonë se unanimiteti mund të përmbushet edhe nëse mungon një lider – që do të thotë se Orban mund të thotë ende se nuk kishte votuar pro.
Lëvizja e pazakontë ngriti ‘vetullat’ si në Bruksel ashtu edhe më gjerë, raporton Euronews, transmeton Klankosova.tv.
Por kjo lëvizje, sipas fjalëve të Scholz-it, nuk mund të bëhet e zakonshme. “Gjërat nuk mund të zgjidhen çdo herë duke dalë nga dhoma. Kjo është për raste të jashtëzakonshme, si për shembull, vendimi që sapo kemi marrë”, Scholz, në një deklaratë për mediat.
Udhëheqësit evropianë, Ursula von der Leyen dhe Charles Michel shprehën besimin se ata do të jenë në gjendje të arrijnë konsensusin – apo edhe të kapërcejnë pozicionin e Viktor Orban në të ardhmen – veçanërisht, në çështjen e dhënies së ndihmës prej 50 miliardë eurosh për Ukrainën, të cilën Orban e bllokoi.
Megjithatë Michel e përmblodhi vendimin për të ndriçuar rrugën evropiane për Gjeorgjinë, Moldavinë dhe Ukrainën si “një mesazh politik shumë të fuqishëm” dhe “një mesazh shprese”.
