Kthehen në punë blloqet B2 dhe A3 të prodhimit të energjisë
Rikthehet furnizimi i rregullt me energji elektrike në Kosovë. Pas rreth një muaji ndërprerje të vazhdueshme të energjisë elektrike KEK-u ka njoftuar se i ka kthyer në prodhim blloqet B2 dhe A3 duke e dyfishuar prodhimin e energjisë elektrike.
Aktualisht Kosova mund të arrijë kapacitetin e prodhimit deri rreth 800 megavat/orë brenda ditës.
Për rreth një muaj Kosova kishte probleme të mëdha të furnizimit me energji elektrike, madje orari i fundit i reduktimit arriti në 3 orë me energji elektrike dhe tri pa të. Në disa fshatra ankoheshin se kanë reduktime deri në 6 orë. Kjo ka dëmtuar bizneset në Kosovë.
Megjithatë edhe këtë dimër qeveria ka paralajmëruar se do të ketë krizë energjetike kur të rritet konsumi, u kanë bërë thirrje qytetarëve për kursim të energjisë elektrike. Pas rritjes së çmimit të energjisë elektrike vitin e kaluar nuk përjashtohet mundësia që të ketë sërish ndryshim të çmimeve.
Tv Klan
