E ardhmja e Kylian Mbappe mbetet dilema e madhe te PSG. Për 25-vjeçarin ka interes të lartë nga skuadrat Europiane, me Real Madrid që është ende në garë. Gjithsesi, mediat franceze besojnë se Mbappe do të nënshkruajë një parakontratë me PSG-në, me marrëveshjen e tij aktuale që skadon në qershorin e vitit 2024. Me kualifikimin në raundin e radhës të Ligës së Kampionëve, 25-vjeçari thuhet se do të luajë edhe pjesën e mbetur të sezonit me gjigantin francez.
Sipas prestigjozes ‘L’Équipe’, Mbappé dëshiron të qëndrojë në Paris gjatë merkatos së janarit. Pavarësisht se fituesi i Kupës së Botës 2018 vazhdon të lidhet me një largim nga kryeqyteti, ai duket se është i përgatitur të qëndrojë me klubin, të paktën për momentin.
PSG është ende në diskutime të vazhdueshme me personat e afërt të sulmuesit francez për një kontratë të re. Për më tepër, ai mund të zgjasë kontratën e tij aktuale me një vit. Ditët e para të vitit të ri do të jenë interesante për t’u ndjekur. Mediat sugjerojnë se Real Madrid do të ketë një afat për propozimin e kushteve të një kontrate me francezin, që kushton pak në treg duke parë edhe skadencën e marrëveshjes me PSG-në.
Klan News
