Zjarri që përfshiu një sallë dasmash të mbushur me njerëz në një qytet të Irakut verior duke vrarë më shumë se 100 njerëz thuhet se ndodhi nga “neglizhenca e madhe” dhe mungesa e masave të sigurisë, sipas rezultateve të një hetimi qeveritar për katastrofën.
Rezultatet e hetimit, të shpallura në një konferencë shtypi të dielën nga ministri i Brendshëm, Abdul Amir al-Shammari, thanë se pronari i sallës dhe tre anëtarë të tjerë të stafit kishin lejuar 900
persona të hynin në vend, kur ishte projektuar për një maksimum prej 400.
“Zjarri ka qenë aksidental dhe i paqëllimshëm dhe ka ndodhur për shkak të pakujdesisë së madhe”, thuhet në gjetjet e hetimit.
“Përdorimi i dekoreve me elemente të fishekzjarrëve ndihmoi që zjarri të përhapej shpejt dhe e shndërroi sallën në një arenë zjarri”, tha Shammari.
Zjarri bllokoi njerëzit brenda sallës së dasmave dhe ekipet e shpëtimit u përpoqën t’i arrinin ata sepse dyert e daljes ishin të pakta dhe të vogla, tha Shammari.
Të paktën 150 persona u plagosën nga zjarri, i cili ishte në qytetin e krishterë Hamdaniya, i njohur gjithashtu si Qaraqosh.
