Sekretari amerikan i Shtetit, Antony Blinken, ka thënë se vendimi i Vladimir Putinit për të pushtuar Ukrainën ka krijuar kaos në vendin e tij.
Blinken, në një intervistë ka thënë se Putini ishte në pragun e Kievit, teksa tani iu desh ta mbrojë Moskën nga një person që e ka krijuar vetë.
“Nëse e vendosni këtë në kontekst 16 muaj më parë, Putin ishte në pragun e Kievit në Ukrainë, duke kërkuar të merrte qytetin brenda pak ditësh, ta fshinte vendin nga harta”, u shpreh Blinken, shkruan BBC, transmeton Klankosova.tv.
“Tani, atij i është dashur të mbrojë Moskën, kryeqytetin e Rusisë, kundër një mercenari të krijuar prej tij”, tha Blinken.
“Pra, mendoj se kjo është e qartë – ne shohim të çara që shfaqen. Ku shkojnë, nëse diku, kur arrijnë atje, është shumë e vështirë të thuhet. Nuk dua të spekuloj për këtë,” thotë ai.
Këto janë ndoshta vërejtjet më të forta për situatën në Rusi deri tani që është parë nga një zyrtar i lartë perëndimor.
