Prokurori publik nga Sektori i specializuar për ndjekjen e veprave penale të kryera nga persona me autorizime policore dhe pjesëtarë të policisë së burgjeve në Prokurorinë Publike të Republikës së Maqedonisë ka nxjerrë urdhëresë për zhvillimin e procedurës hetimore kundër inspektorit të pavarur, anëtar i Njësitit për siguri personale të kryeministrit të Republikës së Maqedonisë së Veriut, i dyshuar se për qëllim përfitimi ka kryer veprën penale dhënien e sekretit zyrtar.
“I dyshuari, si zyrtar, në mbrëmjen e 30 marsit 2025, në parkingun para një hoteli në Veles, u takua me një person të paftuar – një dëshmitar në procedurë dhe i tregoi atij dokumente zyrtare të Ministrisë së Brendshme, të cilat përbëjnë një sekret zyrtar. Me këtë rast i ka lejuar dëshmitarit që të njëjtat dokumente t’i filmojë dhe i ka treguar se cili dokument me çfarë ka të bëjë. Në këtë mënyrë, i dyshuari, me qëllim përfitimi dhe me qëllim që të njëjtat të publikohen në rrjetet sociale, ka mundësuar që dokumentet zyrtare të jenë të qasshme, duke paraqitur zbulim të sekretit zyrtar. Për këtë veprim ai ka dashur të përfitojë 50 mijë euro nga personi për të cilin flitej në dokumente.
Prokuroria Themelore Publike për Ndjekjen e Krimit të Organizuar dhe Korrupsionit bën me dije se as personat dhe as dokumentet në këtë rast nuk kanë lidhje me personat dhe grupin nga Greqia, siç raportuan disa media dje dhe sot”, thuhet në njoftimin e Prokurorisë.
