Prokurorja Ivana Haxhi Vasileva është nën hetim pas akuzave për presion ndaj disa gjykatësve dhe marrje ryshfeti. Ajo dyshohet se ka kërkuar dëshmi të rreme për të dëmtuar gjykatësit, si dhe ka mbyllur kredi duke përdorur ndikimin e saj. Një parashtresë dhe padi penale janë dorëzuar kundër saj për shkelje të etikës dhe keqpërdorim të pozitës.
Në Prokurorinë Publike nuk është paraqitur parashtresë ndaj prokurores Ivana Haxhi Vasileva për shkeljet për të cilat njoftoi Klan Maqedoni dje, thonë nga prokuroria. Madje ata shtojnë se për njoftimet e djeshme në media, prokurorja Vasileva ka dorëzuar parashtresë deri tek Këshilli për Etikë në mediat e Maqedonisë për shkak të, siç thotë ajo, informimit jo të vërtetë dhe thyerjes së rregullave etike për informim të opinionit.
Por cila është e vërteta? E vërteta është se TV KLAN Maqedoni posedon dokumentin me parashtresë kundër prokurores Ivana Haxhi Vasileva të dorëzuar në Këshillin e Prokurorëve të Maqedonisë së Veriut dhe deri tek kryeprokurori Ljupço Jolevski. Parashtresa është pranuar deri tek këto institucione më datë 27 mars, qëndron në dokumentin që siguroi KLAN Maqedoni.
Parashtresa janë dërguar edhe deri tek Komisioni për Anti-korrupsion dhe Policia Financiare, ndërsa punonjësit kanë dorëzuar edhe padi penale deri në MPB ndaj prokurores Ivana Haxhi Vasileva.
Prokurorja Vasileva dyshohet se në muajin shkurt të këtij viti ka ftuar disa persona në bisedë informative dhe ka kryer presion të paparë ndaj tyre dhe kërcënime që të pranonin të jepnin deklarata në dëm të disa gjykatësve në Gjykatën e Apelit, se gjoja i kanë paguar shumë të caktuar për shërbime gjykatësve për lëndë të cilat ajo vetë i ka caktuar, për vendime të caktuara dhe gjykatës të caktuar të kësaj gjykate.
Kjo hakmarrje ndaj këtyre gjykatësve sipas parashtruesve të parashtresës lidhet nga koha kur kjo prokurore ka udhëhequr lëndën dhe hetimin ndaj Zhan Mitrevit. E dërgoi në paraburgim ndërsa gjykatësit e Apelit pranuan garancën që të heqin masën e paraburgimit ndaj Mitrevit.
Qëllimi i këtyre veprimeve të kësaj prokurore është defokusi i opinionit për të mbuluar dështimet e saj në procese të montuara. E njëjta duke keqpërdorur pozitën e saj ka formuar lëndë për ndjekjen e gjykatësve nga Gjykata e Apelit, e cila paraqet shkelje të rëndë të të drejtave të garantuara kushtetuese të gjykatësve për vendimet e tyre të marra në bazë të bindjeve të tyre, e që janë në kundërshtim me dëshirat e prokurores Ivana Haxhi Vasileva, thuhet në parashtresën e punonjësve të Prokurorisë së Shkupit.
Ndërsa në padinë penale ndaj prokurores Haxhi Vasileva në MPB, gjegjësisht në njësitin për krim ekonomik, ajo akuzohet për marrjen e ryshfetit dhe mënyrën e dyshimtë se si në një periudhë të shkurtër kohore ka arritur të mbyllë tri kredi që ka pasur ajo në bankat e vendit.
Si meritë për ngritjen e aktakuzës kundër Zhan Mitrev, asaj, thonë të punësuarit në Prokurorinë Themelore të Shkupit, i është dhënë një sasi e konsiderueshme parash në kesh nga një mik i kryeprokurorit të Shkupit Gavril Bubevski dhe bëhet fjalë për pronar të një klinike private shëndetësore, e cila është konkurrencë serioze e Zhan Mitrevit. Në këtë periudhë, sipas tyre, prokurorja Haxhi Vasileva ka arritur t’i paguajë dhe mbyllë tre kredi të hapura që ka pasur dhe deri sot nuk ka dorëzuar dëshmi se si ka arritur deri tek ato mjete për të paguar këto tri kredi.
