Nëntë sportistëve që do ta përfaqësojnë Kosovën në Lojërat Olimpike “Parisi 2024” iu është dorëzuar flamuri i shtetit nga presidentja Vjosa Osmani.
Pra Kosova në Lojërat Olimpike “Paris 2024”, që startojnë më 26 korrik, do të përfaqësohet nga nëntë sportistë: Distria Krasniqi, Nora Gjakova, Laura Fazliu, Akil Gjakova, Loreana Kuka, Donjeta Sadiku, Gresa Bakraçi, Hana Beiqi dhe Adell Saboviq.
Presidentja Osmani tha se pjesëmarrja e Kosovës në Lojërat Olimpike paraqet kulmin e një pune të madhe. Ajo siguroi sportistët olimpikë kosovarë se gjatë garës në Paris do ta kenë mbështetjen e madhe të gjithë popullit, teksa pati edhe një porosi të veçantë.
“Garoni me nder e luftoni për flamurin e Kosovës që të jetë sa më lartë në skenën globale sportive”, tha Osmani.
Flamurin e shtetit të Kosovës, presidentja Osmani ia dorëzoi xhudistes Nora Gjakova.
Të pranishëm në këtë ceremoni, që u mbajt në Amfiteatrin e Gërmisë, ishin dhe kryeministri Albin Kurti; presidenti i KOK-ut, Ismet Krasniqi; ambasadori i SHBA-së, Jeffrey Hovenier; i Francës, Olivier Guérot; ai i Gjermanisë, Jorn Rohde; përfaqësues të federatave të sportit të Kosovës e dashamirë të tjerë të sportit.
Lojërat Olimpike në Paris do të zhvillohen nga 26 korriku deri më 11 gusht.
