Kryeministri izraelit Benjamin Netanyahu ka konfirmuar se operacioni i planifikuar tokësor në Rafah do të vazhdojë, pavarësisht nga presioni ndërkombëtar dhe shqetësimet për viktima civile. Duke folur në një mbledhje të kabinetit, Netanyahu ka theksuar që asnjë lloj presioni nuk do të pengojë realizimin e objektivave të Izraelit, duke përfshirë eliminimin e Hamasit dhe sigurimin që Gaza nuk do të përbëjë më kërcënim për shtetin hebre.
Presidenti amerikan Joe Biden, i cili ka mbështetur Izraelin gjatë konfliktit, ka paralajmëruar se pushtimi i Rafahut pa plane të besueshme për mbrojtjen e civilëve do të ishte një “vijë e kuqe”. Kryetari i Organizatës Botërore të Shëndetit, Tedros Adhanom Ghebreyesus, ka bërë thirrje për të shmangur sulmin “në emër të njerëzimit”.
Netanyahu ka kritikuar ata që sipas tij po përpiqen të ndalojnë luftën me akuza të rreme kundër Izraelit, dhe ka theksuar se zgjedhjet e reja do të paralizonin vendin dhe do të ndalonin luftën, duke e lënë Izraelin pa arritur qëllimet e tij. Ai ka sfiduar senatorin amerikan Chuck Schumer, duke thënë se kritikat e tij nuk janë vetëm kundër tij, por kundër popullit të Izraelit.
Zëdhënësi i Këshillit të Sigurisë Kombëtare të Shtëpisë së Bardhë, John Kirby, ka shprehur shqetësim për operacionin e planifikuar dhe ka theksuar se Shtetet e Bashkuara nuk do të mbështesin një operacion që nuk mbron civilët. Ndërkohë, administrata e Biden ka theksuar se do të monitorojë situatën me kujdes.
