Kryeministri grek Kyriakos Mitsotakis në konferencën për shtyp që mbajti mbrëmë vonë në Bruksel pas përfundimit të Samitit BE-Ballkanit Perëndimor, tha se me sygjerim të tij do të ketë një samit të jashtëzakonshëm që do të mbahet më 3 shkurt, i fokusuar ekskluzivisht në mbrojtjen evropiane.
Siç raportojnë mediat greke, i pyetur për deklaratat e kryeministrit Hristijan Mickoski për popullin maqedonas, Mitsotakis ka sqaruar se i ka thënë kolegut të tij se duhet respektuar plotësisht marrëveshja e Prespës, si dhe përdorimi i emrit “erga omnes”.
“Përballë meje, pra në takimin që patëm dje në Samit, por edhe sot në mëngjes kur u takuam bashkë në kuadër të takimit përgatitor të Partisë Popullore Evropiane, ai përdori emrin zyrtar dhe unik të shtetit që është “Maqedonia e Veriut”. Për më tepër, ekziston një detyrim për të përdorur “erga omnes”.
Edhe dje edhe sot ritheksova nevojën e respektimit absolut të marrëveshjeve ndërkombëtare. Nuk do ta përsëris mendimin tim për Marrëveshjen e Prespës, por thashë se vendi ynë është i detyruar ta respektojë atë dhe shteti fqinj është i detyruar ta respektojë njëlloj dhe ky është padyshim një kusht i domosdoshëm për të hapur rrugën e tij evropiane”, tha kryeministri Mitsotakis media greke “Skay”.
