Ministri i Mbrojtjes në Mal të Zi, Dragan Krapoviq, tha se do të ketë një prani të shtuar në pjesën lindore të aleancës së NATO-s.
“Ne do të kemi ushtarë në Letoni dhe Bullgari, por do të vazhdojmë të dërgojmë ushtarë në Kosovë dhe Irak. Sa i përket agresionit rus kundër Ukrainës, ne do të dërgojmë ushtarë në përputhje me detyrat e reja të NATO-s”, tha Krapoviq në një konferencë të përbashkët për shtyp në “Vila Gorica” me admiralin Rob Bauer, kryetar i Komitetit Ushtarak të NATO-s dhe Këshilltar për Çështjet Ushtarake të Sekretarit të Përgjithshëm të Aleancës, Jens Stoltenberg.
Ministri tha se takimi i sotëm me Bauer është një mundësi tjetër për të demonstruar përkushtimin e Malit të Zi për anëtarësim të besueshëm në NATO.
“Kur flasim për besueshmërinë, flasim për lëvizje konkrete dhe i thashë admiralit Bauer se Mali i Zi mbetet i përkushtuar për zbatimin e vendimeve që keni marrë në Vilnius në samitin e vitit të kaluar”, tha Krapoviq.
Ai tha se Mali i Zi duhet të rrisë investimet në ushtri, duke treguar se për këto qëllime do të investohen më shumë se dy për qind të buxhetit të këtij viti.
Ai tha se siguria dhe stabiliteti i Ballkanit Perëndimor janë veçanërisht të rëndësishme për Malin e Zi.
“Ne do të vazhdojmë të mbështesim të ardhmen evropiane të Ballkanit Perëndimor”, tha ministri, duke thënë se prania e NATO-s dhe Bashkimit Evropian në Ballkan është e rëndësishme për parandalimin e ndikimit malinj të palëve të treta, shkruan Vijesti, transmeton Klankosova.
