Pasi të inspektohet nga Turqia anija do t’i drejtohet Libanit
Anija e parë që transporton grurin ukrainas për tregjet botërore kaloi në Detin e Zi pranë brigjeve të Turqisë të martën përpara se t’i nënshtrohet inspektimit të planifikuar të mërkurën (3 Gusht) në mëngjes.
Anija Razoni me flamurin e Sierra Leones, u nis nga porti ukrainas i Odesa-s të hënën (1 Gusht).
Nisja e anijes të hënën nga porti ukrainas i Odesa-s për në Liban nëpërmjet Turqisë, sipas një marrëveshjeje kalimi të sigurt të 22 korrikut, ka rritur shpresat për shtimin e eksportit të drithit, gjë që mund të ndihmojnë për zbutjen e krizës globale të ushqimit.
Turqia pret që afërsisht një anije me drithëra të niset nga portet e Detit të Zi të Ukrainës çdo ditë për sa kohë që marrëveshja e kalimit të sigurt mbetet në fuqi, tha të martën një zyrtar i lartë turk.
Kombet e Bashkuara kanë paralajmëruar për rrezikun e urisë këtë vit për shkak të luftës në Ukrainë.
Lundrimi i së hënës u bë i mundur pasi Turqia dhe Kombet e Bashkuara ndërmjetësuan një marrëveshje për eksportin e drithërave dhe plehrave kimike midis Rusisë dhe Ukrainës, një përparim i rrallë diplomatik në mesin e një konflikti ushtarak midis dy palëve.
Klan News
