Ministri serb i Edukimit, Branko Ruzhiç, ka bërë të ditur në Twitter se i ka dorëzuar dorëheqjen, kryeministres së Serbisë, Ana Bërnabiç.
Dorëheqja vjen pasi një nxënës i shkollës fillore “Vladisllav Ribnikar” në Vraçar të Beogradit, vrau tetë nxënës me armë zjarri, si dhe një roje të sigurisë. Si pasojë e sulmit janë plagosur edhe gjashtë nxënës tjetër, dhe mësuesi që ka qenë në klasë.
“Pas heshtjes, në tri ditët e zisë, si njeri i përgjegjshëm dhe me performancë prej profesionisti, përgjatë detyrave të mia të kaluara, si prind, dhe si shtetas i Serbisë, unë vetëm e kam marrë një vendim racional në këto kushte”, ka thënë Ruzhiç.
Në postimin e tij, ai i ka ngushëlluar edhe një herë familjarët e viktimave. Ai ka thënë se dorëheqja e tij është akt personal, por edhe politik.
“Në shoqëritë e zhvilluara demokratike, ky akt është karakteristikë e forcës, ndërsa në rajonin tonë, shpesh është karakteristikë e ligësisë. Le ta gjykojë publiku”, ka thënë Ruzhiç.
Ruzhiç është pjesëtar i Partisë Socialiste të Serbisë, partnere e vogël në koalicionin qeverisës me Partinë Progresive të Serbisë, e cila udhëhiqet nga presidenti i Serbisë, Aleksandar Vuçiç./REL
