Qeveria e Kovaçevskit dhe institucionet nën kontrollin e tij, në vend që të heshtin, duhet të thonë nëse është paguar taksa e shitjes në Soravia dhe si është kryer transaksioni – tha sot përmes një reagimi, deputeti i VMRO-së Dragan Kovaçki, përcjell KlanM.
“A mos vallë nipi i Ahmetit përveç që nuk ka paguar asnjë denar për Soravinë, nuk ka paguar asnjë denar në emër të tatimit në shitje? Sipas asaj që kanë publikuar mediat në hulumtimin e tyre, nuk është regjistruar asnjë transaksion në Maqedoni? Pra, Ahmeti duhet të thotë se si është bërë blerja dhe përmes cilës rregullore tatimore”, thotë Kovaçki.
Kovaçki shtoi se pretendimet e Ahmetit dhe të tjerëve se kjo qendër tregtare është në humbje e me borxhe, janë të rreme.
“Nga informacionet që disponojmë, mund të konstatohet se në dy vite qendra e biznesit Soravia ka realizuar një fitim afër 2 milionë euro. Dhe e gjithë kjo kur nuk përdoret plotësisht. Qendra e Biznesit Soravia është një objekt i madh që ka një hapësirë të madhe të papërdorur. Prandaj, lind pyetja logjike, a do të gjenden si qiramarrës kompani të afërta me qeverinë apo ndoshta organet shtetërore”, thuhet më tej në reagimin e deputetit të VMRO-së./KlanMacedonia
