“SHUMICA QEVERITARE ËSHTË STABILE”
Kryeministri, Dimitar Kovaçevski ka thënë sot se, nëse në opozitë ka parti politike që duhet të jenë pjesë e procesit eurointegrues janë të mirëseardhura t’i bashkohen Qeverisë. Duke u përgjigjur në pyetjet e gazetarëve për mundësinë e zgjerimit të koalicionit qeveritar edhe me Aleancën për Shqiptarët, Kovaçevski tha se, për momentin, Qeveria funksionon me shumicë stabile, por theksoi se se dyert e Qeverisë janë të hapur për të gjithë ata që janë për Maqedoni evropiane.
“Gjatë fjalimit tim të fundit në Kuvend, u bërë ftesë të gjithë deputetëve që janë për konceptin e Maqedonisë evropiane, konceptit RMV në BE deri më 2030, se dyert e Qeverisë janë të hapura për të gjithë pa marrë parasysh përkatësinë e tyre politike. Për shkak se para nesh janë vendimet që duhet t`i marrim. Vendimet duhet të miratohen me konsensus të gjerë”, deklaroi, kryeministri i RMV-së Dimitar Kovaçevski.
Edhe përkundër zërave që kanë qarkulluar kohëve të fundit për rikonstruim më të gjerë të Qeverisë dhe përfshirje të ASH-së në shumicën qeveritare, nga kjo parti kanë mohuar një gjë të tillë. Kryetari i ASH-së, Arben Taravari së fundmi ka thënë se, nuk janë të interesuar për hyrje në qeveri dhe për momentin janë të fokusuar në organizimin e partisë.
Ndërkohë, Qeveria javën e kaluar ka dorëzuar në Kuvend propozimin që Risto Penov të jetë ministër i ri i Vetëqeverisjes Lokale, por ende nuk ka informata kur do të mbahet seanca plenare për zgjedhjen e tij. Tani për tani, nuk ka informata zyrtare për ndryshime të pjesës tjetër të kabinetit qeveritar./KlanMacedonia/
