Delegacioni i Kosovës, i udhëhequr nga Shefi i Grupit Parlamentar të AAK-së, është nisur drejt Strasburgut për dy ditët që mund të shënojnë një kapitull të ri në historinë e vendit.
Me një agjendë të ngjeshur për datat 15 dhe 16 prill, delegacioni do të marrë pjesë në votimet kyçe në komitete dhe në Asamblenë Parlamentare të Këshillit të Evropës.
Dita e parë do të sjellë diskutime në Komitetin për Barazi dhe Mosdiskriminim dhe në Komitetin për Çështje Ligjore dhe të Drejta të Njeriut, ku do të shqyrtohet raporti për aplikimin e Kosovës. Ndërsa dita e dytë do të jetë edhe më thelbësore, me një debat të pritur në Asamblenë Parlamentare rreth orës 16:00, ku do të diskutohet raporti i znj. Dora Bakoyannis dhe do të kërkohet mbështetja e 2/3 e votave të anëtarëve të pranishëm.
Pavarësisht sfidave dhe kundërshtimeve nga disa shtete, shpresat janë të larta për një rezultat pozitiv, i cili do të çonte raportin përpara Komitetit të Ministrave në maj. Angazhimi i palëkundur dhe mbështetja e vendeve mike janë thelbësore në këtë rrugëtim të rëndësishëm për Kosovën, e cila synon të forcojë pozitat e saj në skenën evropiane dhe ndërkombëtare.
