Nga Lëvizja Besa kanë bërë të ditur se kryetari i kësaj partie, Bilall Kasami ka nënshkruar marrëveshje për bashkëpunim me Alternativën, me kreun e kësaj partie, Afrim Gashi.
Në njoftim thuhet se është “momenti historik që imponon që të gjitha forcat politike shqiptare të bashkëpunojmë për ta deligjitimuar qeverisjen aktuale”.
”Lëvizja BESA hedh hapin e parë në krijimin e frontit opozitar, nënshkruhet deklarata politike për bashkëpunim me Alternativën
Në frymë të kërkimit të mënyrave për artikulimin e zërit opozitar shqiptar në Maqedoninë e Veriut, sot – në hapësirat e Kuvendit – u takuan kryetari i Lëvizjes BESA, Bilall Kasami, dhe kryetari Alternativës, Afrim Gashi.
Arsye e këtij takimi ishte zyrtarizimi i gatishmërisë për të bashkëpunuar dhe për t’i bashkërenduar aktivitetet politike të të dyja partive në drejtim të ndërtimit të një kampi opozitar që, fillimisht, do t’i artikulojë dhe mbrojë interesat strategjike integruese të vendit, ato etnike shqiptare dhe, në përgjithësi, ato qytetare, ndërsa më tej do të synohet që ky bashkëpunim të shtrihet në nivele të tjera të ndërveprimit politik.
Duke qenë në një kapërcyell të rëndësishëm, kur procesi integrues po ngec, kur korrupsioni politik është bërë suksesi i vetëm i këtij pushteti, ndërsa të drejtat etnike shqiptare përsëri vihen në peshore të disfavorshme, momenti historik imponon që të gjitha forcat politike shqiptare, por jo vetëm politike, të bashkëpunojmë për ta deligjitimuar këtë qeverisje të korruptuar, të paaftë dhe të dëmshme për interesat e vendit dhe të shqiptarëve. Për këtë qëllim, dy kryetarët, Kasami dhe Gashi, kanë nënshkruar një deklaratë të përbashkët, që është zotimi formal i dy partive përkatëse për ta zyrtarizuar këtë dakordim. Për hapat e mëtejmë, për mundësitë e reja të bashkërendimit, si dhe për faktorët e tjerë që do t’i bashkohen këtij kampi, opinioni do të informohet më kohë” – thuhet në kumtesën e Lëvizjes BESA. /KlanMacedonia/
Kjo është edhe deklarata e nënshkruar nga dy kryetarët e partive:
