Me barazimin 1:1 me Dinamo Kievin, Shkëndija e Tetovës ka mbyllur fazën përgatitore në Antalia të Turqisë. Ndërsa sot ekipi në orët e mëngjesit është kthyer në Tetovë.
Paraprakisht Shkëndija në ndeshjet kontrolluese fitoi Skopjen me rezultatin 6:0 në Tetovë dhe Dinamo Batumin 2:0, Varta Poznan 1:0 dhe Liepajan 1:0 në Antalia. Pas ndeshjes së fundit kontrolluese me Dinamo Kievin, trajneri Jeton Beqiri për faqen e klubit ka deklaruar
“Unë më shumë do të doja të flas për fazën përgatitore të cilën e vlerësoj si të suksesshme për shkak se futbollistët kanë dhënë maksimumin, gëzon edhe situata e tyre shëndetësore, pasi me gjithë ngarkesat që kemi punuar nuk ka ndonjë ankesë dëmtimi.Edhe futbollistët që kanë qenë të lënduar një kohë më të gjatë janë duke u kthyer.
Nuk dua të merrem shumë me rezultatet e ndeshjeve në fazën përgatitore, pasi edhe nuk janë në plan të parë.
E rëndësishme është që gjithë futbollistët të marrin minuta, stërvitjet dhe kushtet e shkëlqyeshme që kemi pasur për punë t’i shfrytëzojmë dhe besoj se në këtë aspekt unë jam i kënaqur me fazën përgatitore.”, deklaroi Beqiri.
Ndërkaq, trajneri i kuqezinjëve Jeton Beqiri e ka vlerësuar të suksesshme fazën përgatitore për shkak se futbollistët kanë dhënë maksimumin.
