Avokati: Vendimet janë nul dhe nuk kanë efekt
Ish-Kryeministri Sali Berisha kërkon shuarjen e masës së sigurisë detyrim për t’u paraqitur dhe ndalim të daljes jashtë vendit në Gjykatën e Posaçme të Apelit.
Me anë të avokatit të tij, Genc Gjokutaj, ai iu drejtua këtë të hënë Shkallës së Dytë duke kundërshtuar të dy vendimet, edhe atë që u dha në mungesë të tij, edhe verifikimin e masës me avokatë të zgjedhur kryesisht nga gjykata duke i konsideruara si të kundërligjshëm.
“Për masat e sigurimit kanë një praktikë antiligjore që kanë aplikuar dhe kjo praktikë të heq mundësinë për të anikmuar me argumente. Të dyja vendimet janë pasojë e moskonsiderimit të provave dhe rrethanave. Të dyja vendimet nuk kanë efekt”.
Të enjten, në 26 Tetor, Gjykata e Posaçme pas 3 ditësh seanca vendosi vijimin e masës së sigurisë “detyrim për t’u paraqitur” të hënën e parë dhe të tretë të çdo muaji për ish-Kryeministrin.
Vendimi u dha me avokat të shtetit, caktuar kryesisht nga Gjykata, pasi vetë ish-Kryeministri nuk pranoi të paraqitej dhe avokatët tij braktisën seancën pasi nuk iu pranuan kërkesat që bënë.
Ish-Kryeministri akuzohet nga SPAK se është përfshirë në korrupsion pasiv në procedurën e privatizimit të ish-kompleksit Partizani.
Për të njëjtën çështje po mbahet në arrest me burg dhëndri i tij, Jamarbër Malltezi ndërsa për biznesmenin Fatmir Bektashi është dhënë masa detyrim paraqitje.
Tv Klan
