Qeveria e re malazeze rikonfirmon projektin e Urës së Bunës
Qeveria e re malazeze e Miljoko Spajic do të vijojë zbatimin e projektit me Shqipërinë për ndërtimin e urës të gjatë 310 metra mbi lumin Buna, e cila do të lidhë Ulqinin dhe Velipojën. Konfirmimi ka ardhur nga shefi i diplomacise malazeze Filip Ivanoviç dhe homologu shqiptar Igli Hasani.
“Ne do të fokusohemi veçanërisht në realizimin e projekteve të përbashkëta, veçanërisht ato që ka të bëjnë me ndërtimin e urës në Bojanë si dhe menaxhimin e përbashkët të peshkimit në liqenin e Shkodrës.”
Projektet e përbashkëta infrastrukturore dhe ato energjitike do të rrisin potencialin zhvillimor në shumë fusha të ekonomisë.
Ky projekt ishte prezantuar nga ish-kryeministri i Malit të Zi, Dritan Abazoviq dhe ai i Shqipërisë Edi Rama, gjatë samitit të “Ballkanit të Hapur” në Ohër.
Ura e re mbi Bunë do të ketë dy korsi të gjera më pak se katër metra dhe do të përfshijë trotuare dhe rrugica për biçikleta.
Duke folur për korridorin Adriatiko-Jonian, ministri Hasani tha se është një nga prioritetet, sepse lidh Evropën Qendrore me rajonin Adriatiko-Jon.
Përsa i përket situatës në rajon Hasani tha se “Shqipëria është e shqetësuar për disa qëndrime të shteteve që po përpiqen të shkaktojnë destabilitet”.
Klan News
