Piloti holandez Max Verstappen fitoi sot garën e Çmimit të Madh të Japonisë në Formula 1, zhvilluar në pistën e Suzuka. Një garë e dominuar nga kampioni i botës, që u rikthye fitues në pistë pas zhgënjimit të dy javëve më parë në Australi.
Jo vetëm kaq, por Red Bull arriti një fitore të dyfishtë, teksa në vendin e dytë u rendit piloti tjetër i saj, meksikani Sergio Perez. Podiumi u kompletua me makinën Ferrari të spanjollit Carlos Sainz, që la pas shokun e tij të skuadrës Charles Leclerc (i katërti).
Edhe pse gara nisi menjëherë me një flamur të kuq, pas aksidentit të Ricciardo dhe Albon, gara nuk dhuroi shumë emocione në pistë. Makina Red Bull ishte ndjeshëm më superiore në pistë dhe pilotët e saj i menaxhuan më mirë gomat (pilotët kryen nga 3 pit stop).
Red Bull ishte një hap më lart se Ferrari, që nuk mundi dot të rivalizojë për fitore pavarësisht se provoi një strategji ndryshe me Leclerc (2 ndalesa). Ajo që vuan këtë sezon është makina Mercedes, larg më të mirëve, duke mos dueluar dot për podiumin.
Kështu, Red Bull shkëputet sërish në renditjen e përgjithshme, ndërkohë që te Ferrari është Sainz ai që bën më mirë se Leclerc. Në zonën e pikëve, pas dyshes Red Bull-Ferrari, u renditën sot edhe Norris, Alonso, Russell, Piastri, Hamilton e Tsunoda. /TvKlan.mk
