Zyrtarët ukrainas kanë raportuar se dy civilë janë vrarë gjatë mesnatës si pasojë e sulmeve ruse me dronë dhe raketa. Guvernatori i rajonit të Harkivit, Oleh Syniehubov, ka thënë se raketat Iskander kanë shënjestruar një objekt infrastrukturor në qytezën Barvinkove në verilindje, duke lënë të vdekur dy persona dhe plagosur tre të tjerë. Më shumë se 50 shtëpi banimi dhe ndërtesa komerciale janë dëmtuar nga sulmet.
Forca ajrore ukrainase ka raportuar se forcat ruse kanë lëshuar katër raketa balistike Iskander gjatë natës, të cilat mbrojtja ajrore nuk ka arritur t’i rrëzojë. Megjithatë, mbrojtja ajrore ka rrëzuar 13 prej 17 dronëve të lëshuar në pesë rajone të ndryshme.
Operatori kombëtar i energjisë, Ukrenergo, ka thënë se dronët kanë shënjestruar qendra të shpërndarjes së energjisë në rajonin qendror Poltava, duke lënë banorët e zonës pa rrymë. Forcat ruse kanë rritur sulmet me dronë dhe raketa në infrastrukturën ukrainase të energjisë që nga marsi, duke lënë miliona njerëz në terr.
Lufta në Ukrainë, e cila ka nisur më 24 shkurt 2022, ka shkaktuar mijëra viktima dhe ka zhvendosur miliona njerëz nga shtëpitë e tyre. Presidenti rus, Vladimir Putin, e quan luftën “operacion special ushtarak” për të çmilitarizuar Ukrainën, ndërsa Perëndimi ka reaguar duke goditur ekonominë ruse me sanksione të ashpra.
