Një pjesë e Murit të Madh të Kinës është dëmtuar rëndë.
Ngjarja raportohet të ketë ndodhur pasi 2 punëtorë kanë tentuar të krijojnë një rrugë të shkurtër për të kryer punimet e tyre dhe kanë përdorur një ekskavator për të gërmuar, gjë që ka dëmtuar objektin e trashëgimisë botërore. Të 2 janë ndaluar dhe rasti është nën hetime të mëtejshme.
Ata hapën një hendek të madh duke zgjeruar një zgavër ekzistuese të Murit të Madh të 32-të në mënyrë që ekskavatori i tyre të mund të kalonte nëpër të. Policia tha se ata e bënë me qëllim që të reduktonin distancën që duhej të kalonin. Oficerët u njoftuan për dëmtimin më 24 Gusht, pasi morën njoftime se kishte një boshllëk të madh në mur.
E vendosur në qarkun Youyu, Muri i Madh i 32-të është një pjesë e Murit të Madh Ming dhe kategorizohet si një vend historik dhe kulturor i cili mbrohet në nivel provincial. Muri i Madh, një vend i trashëgimisë botërore të UNESCO-s që nga viti 1987, u ndërtua dhe u rindërtua në mënyrë të vazhdueshme nga rreth 220 para Krishtit deri në Dinastinë Ming në vitet 1600, kur ishte struktura më e madhe ushtarake në botë. Pjesa më e madhe e asaj që vizitorët shohin sot është ndërtuar gjatë Dinastisë Ming, e cila quhet Muri i Madh Ming.
Në zonat e thella rurale disa pjesë të murit janë dëmtuar ose shembur përgjatë viteve. Sipas një raporti të gazetës “Beijing Times” që mban vitin 2016, më shumë se 305 e Murit të Madh Ming është zhdukur plotësisht, ndërsa vetëm 8% e tij konsiderohet i ruajtur mirë./tvklan.al
