Marrëveshja e Shengenit po bie viktimë e konflikteve të javëve të fundit, teksa gjithnjë e më shumë shtete evropiane po njoftojnë rivendosjen e kontrolleve kufitare me fqinjët e tyre.
Italia, Sllovenia, Kroacia, Austria dhe Gjermania kanë njoftuar kontrolle në vendkalimet kufitare për shkak të frikës nga dhuna ekstremiste, terrorizmi, emigracioni i paligjshëm apo trafikimi i qenieve njerëzore.
Sllovenia raportoi të enjten mbi 48 mijë kalime ilegale të kufirit nga fillimi i vitit deri më 15 tetor, duke detyruar edhe Kroacinë të njoftojë se kufijtë e saj me Slloveninë do të përforcohen deri më 30 tetor.
Italia po ashtu pezulloi të mërkurën rregullat e Shengenit për udhëtimin e hapur, duke rivendosur kontrollet me Slloveninë për të paktën 10 ditë.
Komisionit Evropian i erdhi të hënën edhe një njoftim nga Gjermania, e cila do të shtojë kontrollet në kufirin e saj me Poloninë, Republikën Çeke dhe Zvicrën.
Zona e Shengenit është një zonë e zakonshme pa taksa e 27 vendeve të BE-së. Kroacia ishte e fundit që iu bashkua asaj më 1 janar 2023. Brenda zonës nuk ka kufizime në qarkullimin e njerëzve dhe mallrave. Edhe shqiptarët udhëtojnë tani lirshëm nëpër vendet Shengen, por nga viti 2025 mund të kërkohet një dokument autorizues.
Kodi i Shengenit lejon vendet anëtare të rivendosin kontrollet e brendshme në situata emergjente.
Përveçse prej emigracionit ilegal, shtimi i kontrolleve vjen pas sulmit të palestinezëve të Hamasit ndaj Izraelit dhe sulmeve të cilësuara terroriste në Belgjikë, ku një qytetar vrau dy suedezë në Bruksel dhe në Francë, një 20-vjeçar vrau një mësues.
