Ai ka tërhequr mbështetje të madhe në zgjedhjet presidenciale ruse
Kontrasti nuk mund të ishte më i madh. Herën e fundit që mijëra rusë dolën në rrugë pas pushtimit të plotë të Ukrainës nga Moska, ata u ndoqën nga policia e trazirave, u goditën me shkopinj dhe u hodhën në furgonat e sigurisë.
Në ditët e sotme, ata presin në radhë, shënojnë të dhënat e tyre personale dhe shkojnë në shtëpi, me sa duket pa pasoja, vetëm për të mbështetur një kandidat kundër Putin.
Me dy muaj të mbetur deri sa Vladimir Putin pritet të zgjasë sundimin e tij, Boris Nadezhdin, një ish-deputet i opozitës, po drejton një fushatë të gjatë për të sfiduar presidentin rus Vladimir Putin.
Mbështetësit e tij thonë se ai ka kaluar tashmë shifrën e 100,000, duke fituar mbështetje të konsiderueshme në Moskë dhe Shën Petersburg, por ende ka nevojë për më shumë nga pjesë të tjera të Rusisë pasi nënshkrimet duhet të shpërndahen në të paktën 40 rajone të vendit më të madh në botë.
Nadezhdin shprehet se është i befasuar nga mënyra sesi thirrja e tij për t’i dhënë fund luftës së Rusisë në Ukrainë i kishte shtyrë njerëzit të rreshtoheshin nën dimrin rus për të dhënë nënshkrimin e tyre në mbështetje të tij.
“Kur e nisa fushatën, kur thashë në verë në një mbledhje në Komisionin Qëndror të Zgjedhjeve se do të kandidoj për president, ishte më shumë një sfidë. Unë do të kandidoj për president. Fushata po përparon në një mënyrë absolutisht të mahnitshme. Kur mbajtëm një kongres partie dhe shpallëm mbledhjen e fondeve, sepse as shteti dhe as ndonjë oligark nuk na dha para, pamë që mijëra njerëz të thjeshtë po transferonin shuma prej 100, 1000 rubla në llogarinë tonë, kuptuam se mund të hapnim zyrat zgjedhore dhe kur hapëm zyrat dhe njerëzit filluan të rreshtoheshin për të na dhënë firmat e tyre, kuptuam se ne mund të marrim një rezultat shumë të madh”.
Nën vazhdën e luftimeve intensive, politikani rus flet për pakënaqësi të gjerë në të gjithë Kremlinin dhe luftën e tij.
“Njerëzit janë të lodhur nga e gjithë kjo, njerëzit duan të jetojnë një jetë normale në një vend normal, dhe jo atë që po ndodh tani. Prandaj jam absolutisht i bindur se njerëzit qëndrojnë në radhë në një numër të madh qytetesh në Rusi, dhe qytetarë të Rusisë, qëndrojnë në radhë në një numër të madh qytetesh jashtë vendit, vetëm në Gjermani po mblidhen nënshkrime në 10 qytete. Njerëzit na japin firmat e tyre jo sepse më pëlqejnë shumë, por thjesht sepse ky është një shans për të ndërmarrë disa veprime që synojnë të sigurohet që të ketë paqe, që e gjithë kjo histori me luftën të përfundojë”.
Disa votues të intervistuar nga Reuters duket se konfirmuan se ai po tërheq një votë të përgjithshme kundër luftës.
“Kam ardhur sepse me të vërtetë nuk më pëlqen Putini. Kjo është arsyeja pse. Unë vërtet nuk e njoh aq mirë Nadezhdin, por thjesht nuk mund ta duroj Putinin”.
“Këto nuk janë ende zgjedhje, ne thjesht po vendosim nënshkrimet tona që ky kandidat të marrë pjesë në zgjedhje. Dhe sa më e gjerë të jetë përzgjedhja e kandidatëve aq më mirë është për vendin. Unë uroj vetëm më të mirën për vendin tonë , kjo është arsyeja pse unë jam duke qëndruar këtu”.
“Kam ardhur këtu për të shprehur qëndrimin tim kundër luftës. Besoj se kjo është mënyra e vetme”.
Në sistemin politik të kontrolluar, shumë njerëz kanë kandiduar kundër Putinit në të kaluarën dhe e kanë portretizuar veten si kundërshtarë të vërtetë, por askush nuk ka fituar. Kremlini thotë se zgjedhjet e 15-17 Marsit janë një garë politike në mirëbesim dhe se Putini, i cili gëzon një vlerësim prej rreth 80%, është vërtet popullor.
Putin, i cili ka zgjedhur të kandidojë si i pavarur dhe jo si kandidat i partisë në pushtet Rusia e Bashkuar, ka mbledhur tashmë mbi tre milionë nënshkrime, 10 herë më shumë se 300,000 që i duhen.
Televizioni shtetëror ka punuar gjatë gjithë kohës për gati dy vjet duke u thënë votuesve se konflikti është një luftë ekzistenciale me Perëndimin për një rend të ri botëror. Rezultati i zgjedhjeve nuk vihet në dyshim.
Putin, në pushtet si president për më shumë se dy dekada dhe në kontroll të të gjitha levave të shtetit, do të fitojë një mandat tjetër gjashtëvjeçar në një garë që kritikët thonë se është një imitim i papërpunuar i demokracisë.
Aktualisht janë 11 kandidatë për president. Kritikët thonë se Kremlini ka nevojë për njerëz si Nadezhdini për të ofruar një pamje konkurrence edhe nëse rezultati është një përfundim i paramenduar.
I pyetur nëse Nadezhdini përbën një kërcënim politik për Putinin, zëdhënësi i Kremlinit Dmitry Peskov tha: “Aspak, ne nuk e shohim atë si rival. Çdo qytetar ka të drejtë të kandidojë për president nëse plotëson një sërë kushtesh. “
Nëse Nadezhdini lejohet të kandidojë dhe merr një përqindje të vogël të votave, Kremlini do të jetë në gjendje të tregojë se sa e dobët është opozita ndaj luftës në Ukrainë. Ai është gjithashtu një pikë qendrore e dobishme për të lejuar kritikët e luftës duke përfshirë disa nga gratë e ushtarëve të mobilizuar .
Shumë kundërshtarë të luftës janë larguar nga Rusia ose janë gjobitur ose burgosur sipas ligjeve të ashpra që parashikojnë burgime të gjata për këdo që dënohet për përhapjen e “lajmeve të rreme” për ushtrinë ruse. Nadezhdini shprehet se është i kujdesshëm.
“Nuk po mundohem të shkel ligjin apo të bëj thirrje për ndonjë trazirë. Unë veproj në kuadër të ligjit. Po mbledhim nënshkrime sepse Komisioni Qendror i Zgjedhjeve na ka dhënë leje, ka nxjerrë fletë nënshkrimi dhe ne kemi hapur një llogari. Ne veprojmë vetëm brenda ligjit. Prandaj nuk e kuptoj se si nuk mund të më regjistrojnë, thjesht nuk e kuptoj. Unë jam i vetmi kandidat që në fakt mbledh firma, këtë e sheh gjithë bota”.
Ai shprehet se financimi i vetëm erdhi nga mbështetësit e bazës.
“A keni parë radhët në zyrat e Putinit? Turmat që qëndrojnë në të ftohtë duke thënë “duam të japim firmat tona për Putinin”? Jo nuk ka ndodhur. Dhe nuk po flas as për kandidatë të tjerë. Më duket, pasi kemi nisur këtë fushatë edhe vetë Putini nuk është shumë i sigurt fitoren”.
Si president, premton Nadezhdin, do të ndalonte mobilizimin, do të lironte të burgosurit politikë dhe do të kthente legjislacionin anti-LGBT – tema të cilat në Rusinë e sotme janë afër të shenjta dhe sigurisht që nuk janë për debat publik.
Shumica e rivalëve të tij të vërtetë nuk dalin kurrë në fletëvotim, me një sërë pengesash administrative të krijuara për t’i çrrënjosur ato në fazat e hershme duke krijuar iluzionin e një gare. Me figurat e opozitës ruse të burgosur, të internuar ose të detyruar në ilegalitet, zgjedhjet e këtij viti premtuan të ishin unike por jo emocionuese.
Kujtojmë Yekaterina Duntsova, një aktiviste u skualifikua nga Komiteti Qendror Zgjedhor i Rusisë për “shkelje të shumta” në dokumentet e saj.
Politikanët që zgjedhin një kurs përplasjeje shpesh vuajnë pasojat. Për të përmendur një shembull, Nemtsov u bë një nga kritikët më të zëshëm të Putinit dhe u vra në vitin 2005 për shkak të Kremlinit.
Por Nadezhdini ka qëndruar te personaliteti i tij liberal që kërkon konsensus në një Rusi gjithnjë e më joliberale.
Klan News
