Aleanca për Shqiptarët, krahu i Ziadin Selës ka reaguar tashmë edhe ndaj skandalit të ri që Ministria e Arsimit dhe Shkencës ka larguar tetë shqiptar nga pozitat udhëheqëse për t’i zëvendësuar me maqedonas.
Ata komentojnë ndër të tjera dhe deklaratat e ministrit të Shëndetësisë, Arben Taravarit i cili tha se me VMRO-në kanë raporte normale si partnerë qeveritarë.
ASH ka vazhduar duke e quajtur servil të VMRO-së, koalicionin VLEN.
Reagimi I plotë:
Jarania me VMRO, normale për Taravarin, abnormale për shqiptarët
Çdo ditë diskriminim i shqiptarëve, nuk është normale z.Taravari.
Çdo ditë të largohen shqiptarët nga puna, nuk është aspak normale.
Jaraninë me VMRO-në mund ta keni vetëm ju normalitet.
Së fundmi në njoftimin e Ministrisë për Arsim dhe Shkencë për nominimin e personave në komisionet sektoriale, të gjithë anëtarët shqiptarë janë zëvendësuar me maqedonas dhe nuk vërehet asnjë shqiptar në atë listë. Për çdo ditë, shqiptarët në drejtori dhe institucione të ndryshme largohen nga puna dhe ju ndërpriten kontratat dhe të njëjtit zëvendësohen vetëm me maqedonas. Një ditë në Pyjet e Maqedonisë, të nesërmen në Fondin Inovacion, e më tragjikja e njëjta ndodh edhe në Klinikat shtetërore që janë nën ombrellën e Ministrisë së Shëndetësisë, të udhëhequr nga vetë Taravari. Kjo nuk është normalitet për shqiptarët.
Nuk është normalitet as shfuqizimi i mekanizmit për përfaqësim të drejtë dhe adekuat dhe lënia e fatit të shqiptarëve vetëm më dorën e qeveritarëve maqedonas të cilët tanimë kanë treguar qëndrimin e tyre për uljen e përqindjes së shqiptarëve në institucione. Nuk është normalitet as tendenca për abrogimin e ligjit për përdorimin e gjuhës shqipe.
Normalitet është vetëm gjuha e servilizmit të cilën e dëgjojmë këto ditë nga të gjithë eksponentët e VLEN si në Kuvend ashtu edhe në Qeveri.
– Aleanca për Shqiptarët –
