Në një deklaratë të fundit, VMRO-DPMNE ka kërkuar ndalimin e blerjes së helikopterëve transportues në vlerën prej 250 milionë eurosh gjatë periudhës zgjedhore, duke theksuar se kjo duhet të vendoset nga qeveria e ardhshme.
“Është jashtë çdo operacioni normal që LSDM dhe BDI të zgjedhin një tender prej 250 milionë eurosh disa javë para zgjedhjeve, në një periudhë qeverisjeje teknike. Në vend të helikopterëve luftarakë, qeveria blen helikopterë transportues, gjë që nuk e rrit gatishmërinë luftarake të ARM-së. Përveç kësaj, askush nuk e di se si u zgjodh kompania Leonardo dhe pse kompanitë e tjera, duke përfshirë një kompani amerikane apo një konsorcium gjermano-francez, nuk u zgjodhën. Si u bë përzgjedhja dhe kush e mori vendimin se çfarë të blihej në të vërtetë. Në vend që të shpenzohen 250 milionë euro para zgjedhjeve, të ndërpritet prokurimi dhe pas tij të vendosë qeveria e ardhshme. Me të drejtë populli thotë se ne nuk kemi shtet, është koha ta kthejmë atë”, thuhet në deklaratën e partisë.
VMRO-DPMNE akuzon kundërshtarët e tyre për mosrespektimin e standardeve të transparencës dhe për shfrytëzimin e pozitave qeverisëse në kohë zgjedhore.
