Katër persona janë vrarë dhe dhjetëra të plagosur në sulmet me raketa ruse që shënjestruan kryeqytetin ukrainas Kiev dhe qytetin e dytë më të madh, Kharkiv. Ndërtesa banimi u goditën në qytetin verilindor të Kharkiv, duke lënë tre persona të vrarë dhe 42 të tjerë të plagosur. Në Kiev, disa persona të tjerë u plagosën kur një bllok banesash mori flakë dhe një tjetër u dëmtua.
Mediat shkruajnë se sulmi ajror në Kiev vazhdoi për më shumë se dy orë e gjysmë, më i gjati në kohë që nga 2 janari. Forcat ajrore të Ukrainës deklaruan se kishin shkatërruar 21 nga 41 raketat e lëshuara nga Rusia. Sipas zyrtarëve ukrainas, vetëm në periudhën 29 dhjetor 2023 – 2 janar 2024, Rusia ka lëshuar më shumë se 500 dronë të prodhuar nga Irani në qytetet ukrainase.
Sulmet raketore vijnë vetëm një ditë pasi kryeministri i Polonisë Donald Tusk vizitoi Ukrainën, duke u zotuar se do të vazhdojë ta mbështesë vendin kundër Rusisë dhe duke njoftuar një paketë të re ndihme ushtarake.
Ndërkaq NATO ka nënshkruar një kontratë 1.1 miliardë euro për municion artilerie 155 mm që do t’i furnizohen Ukrainës pas mungesës së municioneve që po pengon përpjekjet e saj në luftë.
“Lufta e Rusisë në Ukrainë është bërë një betejë për municione, kështu që ajo është e rëndësishme që aleatët të rimbushin rezervat e tyre ndërsa ne vazhdojmë të mbështesim Ukrainën. Rritja e prodhimit të municioneve është një domosdoshmëri absolute”, tha Stoltenberg.
Kontrata përfshin edhe 220,000 fishekë municione artilerie, me dërgesat e para që priten në fund të vitit 2025, sipas një zyrtar të NATO-s. Municioni do të furnizohet nga prodhuesi francez i armëve Nexter dhe Junghans i Gjermanisë.
Klan News
