Kryeministri i Kosovës, Albin Kurti, mbrëmë ka zhvilluar një bisedë telefonike me Këshilltarin e Lartë të Departamentit amerikan të Shtetit, Derek Chollet.
Në njoftimin e Zyrës së Kryeministrit bëhet e ditur se ata biseduan për për procesin e dialogut ndërmjet Kosovës dhe Serbisë, marrëveshjen dhe për takimin e së hënës në Bruksel.
Bëhet e ditur se ata folën edhe për situatën në katër komunat në veri të Kosovës pas zgjedhjeve të 23 prillit, përcjell Klankosova.tv.
“Bisedën e filluan me vizitën e suksesshme në Kosovë të Administratores së USAID, Samantha Poëer, e cila bashkë me Kryeministrin Kurti dhe ministren Rizvanolli shpallën ankandin e parë për parkun me energji solare me kapacitet prej 100 MW. Në lidhje me këtë, këshilltari Chollet tha se ajo ishte ndarë me përshtypjet më të mira dhe e falënderoi kryeministrin për pritjen. Kryeministri u shpreh i nderuar dhe mirënjohës për vizitën e administratores Poëer dhe për mbështetjen e vazhdueshme të USAID-it dhe Shteteve të Bashkuara të Amerikës për Kosovën”.
“Ata biseduan edhe për procesin e dialogut ndërmjet Kosovës dhe Serbisë, me theks te zbatimi i plotë dhe i pakushtëzuar i Marrëveshjes Bazike, dhe për takimin e së hënës në Bruksel në nivel të kryenegociatorëve. Folën edhe për situatën në katër komunat në veri të Kosovës pas zgjedhjeve të 23 prillit dhe për finalizimin e procesit zgjedhor me rastin e mbajtjes së seancave konstitutive dhe betimit të kryetarëve të zgjedhur”, thuhet tutje në njoftim.
Ndryshe, Chollet dje zhvilloi një bisedë telefonike edhe me Presidentin e Serbisë, Aleksandar Vuçiq, ku siç u bë e ditur në njoftimin e lëshuar nga presidenca serbe, mes tyre, temë diskutimi ishte Kosova, bashkëpunimi dypalësh Serbi-ShBA si dhe situata në rajon.
